ہیری پوٹر سیریز ایک بار پھر شائقین کو جادوئی اسکول 'ہوگورٹس' کی دنیا میں لے جانے کے لیے تیار ہے، تاہم مرکزی کردار ادا کرنے والے اداکار ڈینیل ریڈکلف اس نئی پیشکش میں کوئی خاص دلچسپی نہیں رکھتے۔ حال ہی میں 35 سالہ اداکار سے سوال کیا گیا کہ کیا وہ ایچ بی او (HBO) کی جانب سے تیار کی جانے والی نئی سیریز دیکھیں گے، جس پر انہوں نے جواب دیا کہ، "ایمانداری سے کہوں تو مجھے نہیں معلوم کہ میں اسے دیکھوں گا یا نہیں۔

میں پہلے ہی ہیری پوٹر کا کافی حصہ رہ چکا ہوں، اور ویسے بھی میں زیادہ ٹی وی نہیں دیکھتا۔ کسی بھی چیز کو آٹھ گھنٹے تک دیکھنا بہت طویل دورانیہ ہے۔" اداکار کے اس بیان کے بعد سوشل میڈیا پر حایرانی کا اظہار کیا گیا، تاہم صارفین کا ماننا ہے کہ ڈینیل ریڈکلف اپنی زندگی کا ایک بڑا حصہ اس فرنچائز کے ساتھ گزارنے کے بعد اب اس سے تھک چکے ہیں۔

دوسری جانب کچھ صارفین نے دعویٰ کیا کہ اداکار شاید مصنفہ جے کے رولنگ (J.K. Rowling) کے حالیہ برسوں میں سامنے آنے والے متنازع خیالات کی وجہ سے خود کو اس فرنچائز سے دور رکھنا چاہتے ہیں۔ ایک صارف نے تبصرہ کیا، "یہ معاملہ صرف وقت کا نہیں ہے۔

میں اسے نہیں دیکھوں گا کیونکہ میرے نزدیک اقلیتوں کے حقوق ہیری پوٹر سے زیادہ اہم ہیں، اور چونکہ میرا اس فرنچائز سے کوئی تعلق نہیں، میں یہ بات براہِ راست کہہ سکتا ہوں۔" ایک اور مداح نے لکھا، "اس شخص نے اپنی زندگی کا نصف حصہ اس فرنچائز کو دیا ہے۔

نیز، مجھے نہیں لگتا کہ انہیں رولنگ کے موجودہ نظریات سے کوئی دلچسپی ہے اور وہ اب ان سے کوئی تعلق نہیں رکھنا چاہتے۔ انہیں آگے بڑھنے دیں۔" مزید تبصروں میں لکھا گیا، "وہ اور کیسے کہہ سکتے تھے کہ انہیں اس نئے ری میک میں کوئی دلچسپی نہیں،" اور یہ کہ "مجھے سمجھ نہیں آتا کہ آخر اس ری بوٹ کی ضرورت ہی کسے تھی۔"