پاکستان کے وزیر خزانہ نے اتوار کے روز سوشل میڈیا پلیٹ فارم ایکس پر اپنے ایک بیان میں بتایا کہ انہوں نے نجکاری کے عمل سے گزرنے والی پاکستان انٹرنیشنل ایئرلائنز پی آئی اے کے لیے بوئنگ طیاروں، ریفائنری اپ گریڈز اور جنوب مغربی بلوچستان کے تانبے اور سونے کے کان کنی کے منصوبے ریکوڈک کے حوالے سے امریکی ایکسپورٹ امپورٹ بینک سے ممکنہ فنانسنگ پر تفصیلی تبادلہ خیال کیا۔ ان کے مشیر خرم شہزاد نے اس بات کی وضاحت کی کہ حکومت پی آئی اے کو فنانسنگ اور سپلائرز تک رسائی حاصل کرنے میں مدد فراہم کر رہی ہے، لیکن خود کوئی طیارے نہیں خرید رہی۔

خرم شہزاد کا اپنے بیان میں مزید کہنا تھا کہ حکومت نے اس سلسلے میں نہ تو کوئی خود مختار ضمانت دی ہے اور نہ ہی ٹیکس دہندگان کے پیسوں سے کوئی قرضہ لیا گیا ہے۔ انہوں نے واضح کیا کہ امریکی ایگزم بینک طیاروں کے خلاف فنانسنگ محفوظ بنا سکتا ہے اور ایئرلائن یا لیز پر لینے والے ادارے کی ساکھ کا جائزہ لے سکتا ہے، اس لیے کسی بھی قسم کی خود مختار ضمانت کا حصول خود بخود یقینی نہیں ہوتا۔