برطانوی شاہی خاندان کے امور پر گہری نظر رکھنے والے ایک ماہر نے دعویٰ کیا ہے کہ پرنس ہیری، جو شاہی خاندان کے قریب ہونے کے لیے برطانیہ میں زندگی دوبارہ شروع کرنا چاہتے ہیں، پر اپنی سوتیلی والدہ ملکہ کمیلا کا ایک اہم قرض بقایا ہے۔ پرنس ہیری نے ماضی میں شاہی خاندان کے سینئر ارکان کے بارے میں عوامی سطح پر گفتگو کی ہے، جن میں 79 سالہ ملکہ کمیلا کے بارے میں بھی ناپسندیدہ تبصرے شامل ہیں۔

دسمبر میں سینڈرنگھم میں شاہی خاندان کے ساتھ کرسمس گزارنے کی افواہوں کے درمیان، رابرٹ جابسن نے دعویٰ کیا ہے کہ سنہ 2023 کی اپنی یادداشتوں کی کتاب 'اسپیئر' میں ملکہ پر تنقید کرنے کے بعد پرنس ہیری پر سب سے پہلے معافی کا قرض بقایا ہے۔ یہ ان رپورٹس کے سامنے آنے کے بعد ہوا ہے جن میں کہا جا رہا ہے کہ ڈیوک اور ڈز آف سسیکس اپنے دو بچوں، پرنس آرچی اور پرنسس للی بیٹ کے ہمراہ رواں ماہ کے آخر تک برطانیہ واپس آنے کے لیے تیار ہیں۔

پرنس ہیری نے اپنی کتاب میں لکھا تھا کہ انہوں نے ذاتی پی آر کی قربان گاہ پر ان کی قربانی دی، جب کہ ملکہ کمیلا خاموش رہیں۔ مصنف نے ڈیلی میل کے لیے لکھے گئے اپنے کالم میں کہا کہ ان کے بھائی کے لیے بھی قرض تاحال ادا نہیں کیا گیا۔ تاہم، رابرٹ نے دعویٰ کیا کہ پرنس ہیری کے کھڑے ہو کر معافی مانگنے کے امکانات بہت کم ہیں۔

شاہی ماہر نے مزید کہا کہ لیکن اگر شاہی خاندان کو متحد ہونا ہے تو یہ معافی انتہائی ضروری ہے۔ ڈیوک نے یہ بھی دعویٰ کیا تھا کہ انہوں نے اور پرنس ولیم نے اپنے والد، کنگ چارلس سے التجا کی تھی کہ وہ ملکہ کمیلا سے شادی نہ کریں۔ پرنس ہیری نے اپنے ایک انٹرویو میں کہا تھا کہ ہم نے ان کا ہاتھ ہلایا اور انہیں نیک خواہشات پیش کیں، ہمارے دل میں کوئی میل نہیں تھا۔

سنہ 2023 میں ایک اور انٹرویو کے دوران، پرنس ہیری نے اینڈرسن کوپر سے اپنی سوتیلی والدہ کے بارے میں بات کرتے ہوئے کہا تھا کہ وہ شادی میں تیسرا فریق تھیں اور انہیں اپنی شبیہ بحال کرنے کی ضرورت تھی۔ اس تمام صورتحال کے باوجود، یہ دیکھنا باقی ہے کہ آیا پرنس ہیری مستقبل میں شاہی خاندان کے ساتھ اپنے تعلقات کو بہتر بنانے کے لیے کوئی عملی قدم اٹھاتے ہیں یا نہیں۔