برطانوی شاہی خاندان کی اہم شخصیت پرنسس این بالموورل میں کنگ چارلس کے ساتھ ایک اہم ملاقات کے بعد منظرِ عام پر آئیں اور انہوں نے اسکاٹ لینڈ میں رننگ کرنے والے ایک نوجوان کو سراہا۔ میڈیا رپورٹس کے مطابق پرنسس رائل نے اسکاٹ لینڈ میں دوڑنے والے ایک ڈیجیٹل کنٹینٹ کری ایٹر فنلے جیکبس کو حوصلہ افزا کلمات کہے۔ فنلے جیکبس نے اپنے انسٹاگرام ہینڈل پر کنگ چارلس کی اکلوتی بہن کے ساتھ اپنی غیر متوقع ملاقات کا احوال شیئر کیا۔

نوجوان نے بتایا کہ وہ اس گھر کے پاس سے گزر رہے تھے کہ اتنے میں ایک لینڈ روور آکر رکی اور یہ خاتون باہر نکل آئیں۔ انہوں نے بتایا کہ پرنسس این نے انہیں ہیلو کہا جس پر انہوں نے بھی جوابی سلام کیا اور جب دوبارہ دیکھا تو دنگ رہ گئے۔ اس انفلوئنسر کا دعویٰ ہے کہ پرنسس رائل نے ان کی طرف دیکھا اور انہیں مسلسل آگے بڑھتے رہنے کا مشورہ دیا۔

نوجوان نے شاہی شخصیت کے ساتھ تصویر یا ویڈیو بنانے کی خواہش ظاہر کی لیکن ان کی نجی زندگی کا احترام کرتے ہوئے ایسا کرنے سے گریز کیا۔ یہ بات سامنے آئی ہے کہ پرنسس این اور ان کے شوہر سر ٹم لورنس سمر بریک سے لطف اندوز ہونے کے لیے دیگر شاہی افراد کے ساتھ تاحال بالموورل میں موجود ہیں۔

اس سے قبل یہ اطلاعات بھی سامنے آئی تھیں کہ ہیری اور میگن کی حیرت انگیز واپسی کے بعد کنگ چارلس نے بالموورل میں پرنس ولیم اور پرنسس کیٹ سمیت سینئر شاہی افراد کے ساتھ ایک اہم میٹنگ کی۔