پرنسس آف ویلز کیٹ مڈلٹن شاہی ذمہ داریوں کے دوران درپیش ایک خاص پہلو سے متعلق سچائی کا اعتراف کرنے سے گریز نہیں کرتیں۔ کینسر کے خلاف طویل جنگ میں کامیابی کے بعد وہ باقاعدہ طور پر عوامی زندگی میں واپس آ چکی ہیں، تاہم انہیں اب بھی شاہی فرائض کی انجام دہی میں مشکلات کا سامنا ہے۔ شاہی محل کے اندرونی ذرائع کے مطابق پرنسس کیٹ کے لیے پرہجوم استقبالیہ تقاریب دھیمی آواز کی وجہ سے انتہائی مشکل ثابت ہوتی ہیں۔ وہ ایسی شخصیت نہیں ہیں جو ہجوم سے بھرے کمرے میں قدرتی طور پر اونچی آواز میں بات کر سکیں، اس لیے اتنے شور میں اپنی آواز سنانا شاہی خاندان کی اس ہر دلعزیز شہزادی کے لیے ایک چیلنج بن جاتا ہے۔

جب وہ شاہی فرائض کی انجام دہی کے لیے باہر نکلتی ہیں تو لوگ مسلسل ان کے گرد جمع رہتے ہیں اور ان سے بات کرنے کا موقع حاصل کرنا چاہتے ہیں۔ کیٹ ہر بات چیت کو انتہائی سنجیدگی سے لیتی ہیں اور یہ پسند نہیں کرتی ہیں کہ کسی کو ایسا محسوس ہو کہ اسے محض کسی تقریب کے ایک حصے کے طور پر نمٹا دیا گیا ہے۔ ایک اندرونی ذریعے نے بتایا کہ اس سے یہ تقریبات مزید مشکل ہو جاتی ہیں کیونکہ کیٹرین کا رجحان یہ ہوتا ہے کہ وہ رکیں، توجہ سے سنیں اور لوگوں کو اپنی پوری توجہ دیں، بجائے اس کے کہ صرف چند کلمات کا تبادلہ کر کے فوراً آگے بڑھ جائیں۔

انہوں نے مزید بتایا کہ یہ اب ایک مذاق کی شکل اختیار کر چکا ہے کیونکہ انہیں باقاعدگی سے اونچا بولنے کی ترغیب دی جاتی ہے اور بعض اوقات وہ مہمانوں سے شیڈول سے کہیں زیادہ وقت تک گفتگو کرتی ہیں۔ انہیں عوامی اجتماعات میں شرکت کی تربیت دی گئی ہے، لیکن بڑھتے ہوئے اعتماد کے باوجود وہ اونچی آواز کے مقابلے میں خاموش رہنا زیادہ پسند کرتی ہیں۔

کیٹرین نے خود بھی بکنگھم محل میں ملکہ الزبتھ دوم کی پیدائش کی صد سالہ تقریب کے موقع پر شریک خواتین سے بات چیت کرتے ہوئے اس مشکل کا اعتراف کیا تھا۔ پرنسس آف ویلز نے مصروف محل کے اندر مہمانوں سے بات کرتے ہوئے کہا تھا کہ مجھے یہ ماحول واقعی بہت مشکل لگتا ہے، میری آواز بھی بہت دھیمی ہے اس لیے مجھے ہمیشہ کہا جاتا ہے کہ ذرا اونچا بولیں!