برطانوی شاہی خاندان کی مستقبل کی ملکہ کیٹ مڈلٹن نے صحت سے متعلق ایک اہم مشن کی حمایت کے لیے اچانک منظرِ عام پر آ کر سب کی توجہ مبذول کر لی۔ نشے کے عادی افراد کی مدد کرنے والی فلاحی تنظیم فارورڈ ٹرسٹ کی سرپرست ہونے کے ناطے، شہزادی کیٹ نے ایسیکس کے علاقے ساؤتھ اینڈ میں واقع گیرون پارک میں اس کے فارورڈ گروئنگ اقدام کا دورہ کیا۔ شہزادی آف ویلز نے نشے سے آگاہی کے ہفتے کے موقع پر اس بات پر روشنی ڈالی کہ فطرت کس طرح شفا یابی میں مدد کرتی ہے۔

انہیں فارورڈ ٹرسٹ کا باغ دکھایا گیا، جہاں نشے کے مسائل سے لڑنے والے افراد اپنی بحالی کے لیے باغبانی میں حصہ لیتے ہیں۔ بحالی کے عمل سے گزرنے والے افراد سے بات چیت کے دوران کیٹ نے کہا کہ مجھے اپنے شوہر کو یہاں لانا چاہیے تھا، وہ باغبانی کے بارے میں بہت کچھ جانتے ہیں اور اس میں واقعی دلچسپی رکھتے ہیں۔ انہوں نے اس سرسبز و شاداب جگہ کی تعریف بھی کی، تاہم شہزادی باغبانی کی بڑی ماہر معلوم نہیں ہوتیں کیونکہ انہوں نے انکشاف کیا کہ وہ اس بارے میں تھوڑا سا جانتی ہیں۔

شہزادی آف ویلز کی جانب سے ولیم کے بارے میں دیے گئے یہ ریمارکس اس خبر کے بعد سامنے آئے ہیں جن میں دعویٰ کیا گیا تھا کہ ارل اسپینسر کی سنسنی خیز کتاب اور اس میں پرنس ہاری کی مبینہ شمولیت نے مستقبل کے بادشاہ کی صحت پر اثر ڈالا ہے۔ وہ مبینہ طور پر حالیہ تنازعات کے سلسلے پر شدید غصے میں ہیں، جس سے تاج کی مضبوط پوزیشن کو خطرہ لاحق ہو سکتا ہے۔