برطانوی گلوکار زین ملک اور نائجیریا کی معروف گلوکارہ آئرا سٹار کے نئے گانے 'ہیون بیبی' کی میوزک ویڈیو کی آمد کا انتظار ختم ہونے کے قریب ہے۔ جمعہ 25 ستمبر کو سابق ون ڈائریکشن سٹار نے آنے والی میوزک ویڈیو کی پہلی جھلک شیئر کر کے مداحوں کو بے حد پرجوش کر دیا۔ انہوں نے ویڈیو بنانے کے دوران کی کچھ پردے کے پیچھے کی فوٹیج سوشل میڈیا پر پوسٹ کی۔ زین ملک نے انسٹاگرام پوسٹ کے کیپشن میں لکھا کہ کچھ ابتدائی بی ٹی ایس کلپس اور ویڈیو جلد آرہی ہے۔ اس اعلان نے زین ملک کے مداحوں میں زبردست جوش و خروش پیدا کر دیا۔ مداحوں کے اکائونٹس نے اس فوٹیج کو دوبارہ شیئر کیا اور لوگوں کو اگلے ہفتے آنے والی طویل انتظار کی حامل میوزک ویڈیو کے لیے تیار رہنے کی ترغیب دی۔

بی ٹی ایس فوٹیج میں اس جوڑے کی کیمسٹری کی ایک جھلک ملتی ہے، جس میں دونوں کو جدید اندرونی حصوں سے لے کر چھت جیسے سٹائلش مقامات پر دیکھا جا سکتا ہے۔ کلپس میں شوٹنگ کے دوران کے زیادہ پرسکون اور خوشگوار لمحات کو بھی کیپچر کیا گیا ہے۔ ایک لمحے میں نائجیریا کی گلوکارہ اور نغمہ نگار 33 سالہ زین ملک کو پوکیمون اور یو-گی-او کارڈز کا تحفہ دیتی نظر آتی ہیں، جس پر گلوکار نے انتہائی خوشی کا ردعمل ظاہر کیا۔ ایک مداح کے اکائونٹ نے مزاحیہ انداز میں اس لمحے کا خلاصہ کرتے ہوئے ردعمل دیا کہ وہ تین سال کے بچے کی طرح برتاؤ کر رہے ہیں۔

ٹیزر میں دونوں فنکاروں کو سرخ پارٹی گلاسز میں مشروبات سے لطف اندوز ہوتے اور شوٹس کے درمیان غیر رسمی گفتگو کرتے ہوئے بھی دکھایا گیا ہے۔ یاد رہے کہ 'ہیون بیبی' گانا 14 اگست کو 24 سالہ آئرا سٹار کی البم کے حصے کے طور پر جاری کیا گیا تھا۔ آر اینڈ بی اور افرو بیٹس کی اس شراکت داری نے دونوں فنکاروں کے مداحوں میں تیزی سے توجہ حاصل کی تھی۔

گانے کی ریلیز کے وقت اگرچہ ایک ویژولائزر اور لیرک ویڈیو سامنے آئی تھی، تاہم مداح اب بھی باضابطہ میوزک ویڈیو کا انتظار کر رہے ہیں۔ اب زین ملک کی اس نئی پوسٹ سے یہ ظاہر ہوتا ہے کہ مداحوں کا یہ طویل انتظار بالاآخر ختم ہونے والا ہے اور یہ ویڈیو جلد ہی منصہ شہود پر آئے گی۔