پیرس: تازہ ترین ڈیٹا کے مطابق دنیا کے سمندروں کا درجہ حرارت گزشتہ روز اس سطح پر پہنچ گیا جو اس سے پہلے کبھی ریکارڈ نہیں کیا گیا۔ اوسط سطحی درجہ حرارت 21.1 ڈگری سینٹی گریڈ رہا، اور سمندروں کی بڑھتی ہوئی حدت موسمیاتی بحران کی ایک واضح علامت ہے۔ فوسل فیول جلانے کے نتیجے میں خارج ہونے والی کاربن ڈائی آکسائیڈ کی وجہ سے پھنسی ہوئی حرارت کا 90 فیصد سے زیادہ حصہ سمندروں میں جذب ہو جاتا ہے۔

سائنسدانوں نے خبردار کیا ہے کہ گرم سمندر، سطح سمندر میں اضافے اور شدید طوفانوں کو مزید ابتر بناتے ہیں جو اربوں انسانوں کے لیے خطرہ ہیں، جبکہ یہ سمندری ہیٹ ویوز کا سبب بھی بنتے ہیں جو سمندری حیات کو تباہ اور ساحلی ذرائع معاش کو نقصان پہنچاتی ہیں۔

شمالی نصف کرے کا موسم گرما پہلے ہی یورپ اور شمالی امریکہ میں ریکارڈ توڑ گرمی کی لہروں، خشک سالی اور جنگلات کی آگ جبکہ ایشیا میں شدید بارشوں اور طوفانوں کی زد میں آ چکا ہے۔

سمندری حرارت میں اس اچانک اضافے کو ایل نینو کے تیزی سے ترقی پاتے ہوئے واقعے کی وجہ سے مزید تقویت مل رہی ہے، جو کم از کم ایک صدی کا سب سے گرم واقعہ ثابت ہونے جا رہا ہے۔