ہالی ووڈ کے مقبول ترین جوڑے زینڈایا اور ٹام ہالینڈ نے اپنی نجی زندگی کے تحفظ کے لیے سخت اقدامات کرتے ہوئے اپنے دیرینہ اسٹائلسٹ لا روچ کے لیے نئے ضابطہ کار طے کر لیے ہیں۔ یہ قدم اس وقت اٹھایا گیا جب لا روچ نے غلطی سے ان کی شادی کا راز فاش کر دیا تھا، حالانکہ دونوں اداکاروں میں سے کسی نے بھی اس کی باقاعدہ تصدیق نہیں کی تھی۔

ریڈار آن لائن کی ایک رپورٹ کے مطابق، ذرائع کا دعویٰ ہے کہ یہ جوڑا اب بھی لا روچ پر مکمل بھروسہ کرتا ہے اور ان سے گہرا لگاؤ رکھتا ہے، تاہم انہوں نے واضح کر دیا ہے کہ ان کی ازدواجی اور گھریلو زندگی اب ان حدود سے باہر ہو گی۔ ذرائع کے مطابق، "ٹام اور زینڈایا لا روچ کو بہت پسند کرتے ہیں اور ان پر بھروسہ بھی کرتے ہیں، لیکن شادی کے انکشاف کے بعد انہوں نے واضح کر دیا کہ شادی اور گھریلو زندگی کی تفصیلات اب صیغہ راز میں رہنی چاہئیں۔"

یہ واقعہ یکم مارچ کو پیش آیا جب ریڈ کارپٹ پر لا روچ سے اس جوڑے کے بارے میں پوچھا گیا تو انہوں نے برملا کہہ دیا کہ "شادی پہلے ہی ہو چکی ہے، آپ لوگ اسے مس کر چکے ہیں!" اس بیان کے بعد انٹرنیٹ پر ہنگامہ مچ گیا۔ بعد ازاں ٹام ہالینڈ نے جون میں شادی کی تصدیق کی، جبکہ میڈیا رپورٹس کے مطابق جوڑے نے انگلستان میں خاندان اور قریبی دوستوں کے ساتھ نجی تقریب میں خوشیاں منائیں۔

ذرائع کا کہنا ہے کہ یہ جوڑا اب اپنی ذاتی زندگی سے متعلق اطلاعات کو خود کنٹرول کرنا چاہتا ہے، جس کے تحت لا روچ کی زبان پر بھی مؤثر انداز میں پابندی لگانی پڑی ہے۔ ٹام ہالینڈ ماضی میں زینڈایا کے ساتھ اپنے رشتے کی اہمیت پر کھل کر بات کر چکے ہیں اور انہیں اپنی بہترین دوست قرار دے چکے ہیں۔

واضح رہے کہ لا روچ سنہ 2011 سے زینڈایا کے لیے اسٹائلنگ کے فرائض انجام دے رہے ہیں اور ان کے قابلِ اعتماد فیشن پارٹنرز میں شمار ہوتے ہیں۔ تاہم، شادی کے معاملے پر اب ان کے لیے یہی بہتر ہے کہ وہ خاموشی اختیار کریں۔