ہنگری کے مشرقی علاقے میں اتوار کی صبح ایک موٹروے پر پولش بس کے الٹنے کے نتیجے میں کم از کم 12 افراد ہلاک اور کم از کم 10 زخمی ہو گئے۔ ہنگری کے وزیر اعظم پیٹر میگائر نے اتوار کی صبح فیس بک پر جاری کردہ ایک پوسٹ میں اس المناک حادثے کی تصدیق کی۔ پولیس کے مطابق یہ بس اتوار کی صبح سویرے مشرقی ہنگری کے قصبے میزوکریزٹس کے قریب کھائی میں جا گری اور الٹ گئی۔

پولیس کا مزید کہنا تھا کہ حادثے کے وقت یہ بس موٹروے پر نیرگہیضا شہر کی طرف جا رہی تھی۔ سرکاری خبر رساں ایجنسی ایم ٹی آئی کے مطابق بس میں 57 مسافر اور دو ڈرائیور سوار تھے۔ جائے وقوعہ سے سامنے آنے والی تصاویر میں ایک بری طرح تباہ شدہ سرخ بس کو موٹروے کے کنارے کھائی میں ایک طرف پڑے ہوئے دیکھا جا سکتا ہے، جس کی کھڑکیاں ٹوٹی ہوئی تھیں اور سامان نیز سوٹ کیس ادھر ادھر بکھرے ہوئے تھے۔

پولیس نے اپنی ویب سائٹ پر جاری کردہ بیان میں بتایا کہ ایم 3 موٹروے پر نیرگہیضا کی طرف جانے والی پولش رجسٹرڈ بس سڑک کے سیدھے حصے سے ہٹ کر کھائی میں چلی گئی اور الٹ گئی۔ ابتدائی معلومات سے یہ بات سامنے آئی ہے کہ ڈرائیور غالباً سو گیا تھا۔ پولیس کے مطابق حادثے میں بارہ افراد اپنی جان سے ہاتھ دھو بیٹھے جبکہ کئی دیگر زخمی ہو گئے، اور پولیس نے بس ڈرائیور کو حتحراست میں لینا شروع کر دیا ہے۔

حادثے میں زخمی ہونے والے افراد کو فوری طور پر اسپتال منتقل کر دیا گیا ہے۔ پولش صدر کارول ناوریکی نے ایکس پر اپنے پیغام میں کہا کہ انتہائی رنج و غم کے ساتھ مجھے ہنگری میں پیش آنے والے پولش بس حادثے کی المناک خبر موصول ہوئی ہے، جس میں ہمارے اتنے سارے ہم وطن جان کی بازی ہار گئے۔

پولش وزیر خارجہ رادوسلاف سیکورسکی نے ایکس پر بیان دیتے ہوئے کہا کہ ہنگری میں پولش سیاہوں کو لے جانے والی بس کو ایک المناک حادثہ پیش آیا ہے۔ انہوں نے مزید کہا کہ قونصلر سروس مکمل طور پر فعال ہے اور ہم ہنگری کے حکام کے ساتھ مسلسل رابطے میں ہیں۔ وزارت خارجہ اس سلسلے میں تمام مصدقہ معلومات فراہم کرتی رہے گی۔