ماضی کی ماڈل اور ڈونلڈ ٹرمپ جے آر کی سابقہ اہلیہ ونیسا ٹرمپ نے یہ ثابت کر دیا ہے کہ مشکل ترین حالات میں بھی ان کے لیے ماں کا فریضہ سب سے پہلے ہے۔ 48 سالہ ونیسا ٹرمپ نے حال ہی میں اپنی بڑی بیٹی کائی ٹرمپ کو یونیورسٹی آف میامی میں اس کے پہلے کالج اپارٹمنٹ میں منتقل کرنے میں بھرپور مدد کی۔

نوجوان گولفر کائی ٹرمپ نے انسٹاگرام پر ایک ویڈیو شیئر کی ہے جس میں ماں اور بیٹی کی یہ جوڑی ٹارگٹ اسٹور سے اپارٹمنٹ کی ضروری اشیاء کی خریداری کرتی دکھائی دیتی ہے۔ بظاہر تھکی ہوئی ونیسا ٹرمپ نے اس تھکا دینے والے عمل پر مزاحیہ انداز میں کہا کہ وہ اپارٹمنٹ جانے اور سامان منتقل کرنے کی دوڑ دھوپ سے بالکل نڈھال ہو چکی ہیں۔

کائی ٹرمپ، جنہوں نے یونیورسٹی آف میامی میں گولف کھیلنے کا عزم ظاہر کیا ہے، ونیسا اور ڈونلڈ ٹرمپ جے آر کے پانچ بچوں میں سب سے بڑی ہیں۔ یاد رہے کہ ونیسا اور ڈونلڈ ٹرمپ جے آر نے 2018 میں راہیں جدا کر لی تھیں اور ان کی یہ بیٹی اس وقت کالج کی زندگی میں قدم رکھ رہی ہے۔

رواں سال مئی میں بریسٹ کینسر کی تشخیص اور سرجری کے بعد صحتیابی کے اس سفر میں ونیسا کو ان کے دوست ٹائیگر ووڈز کی معاونت بھی حاصل رہی ہے۔ اپنی بیماری اور تکلیف کے باوجود ونیسا ٹرمپ اس بات کو یقینی بناتی ہیں کہ ان کے بچے ہمیشہ ان کی پہلی ترجیح رہیں۔